“Kur yjet bashkuan dy kombet: Cana, Hasi dhe brezi i artë në ndeshjen e pavarësisë”

Fotoreporteri i “Raporto24”, Blerim Uka, ju sjell në kujtesë këto foto të rralla nga një prej ndeshjeve më të veçanta në historinë e futbollit shqiptar.

Prishtinë, 14 qershor 2008 – Stadiumi i qytetit ne një atmosferë që rrallë është parë në futbollin shqiptar. Kosova dhe Shqipëria u përballën në një ndeshje miqësore simbolike, e cila mbetet përgjithmonë pjesë e historisë së sportit dhe identitetit kombëtar. Ky duel u organizua në kuadër të shënimit të 100 ditëve të Pavarësisë së Kosovës, duke shndërruar fushën e blertë në një skenë unikati, uniteti dhe emocioni të pastër,shkruan Raporto24

Në atë periudhë, Kosova ende nuk njihej zyrtarisht nga FIFA dhe UEFA, por prezantimi i “Dardanëve” në këtë takim tregoi ambicien, forcën dhe dëshirën e një kombi të ri për t’u afirmuar ndërkombëtarisht. Përballë tyre qëndronte Shqipëria, me një ekip të përbërë nga lojtarë të kampionatit vendas dhe disa emra të afirmuar, të cilët vinin në Prishtinë me një mesazh të thjeshtë, por të madh: futbolli bashkon atë që politika shpesh e ndan.

Takimi përfundoi me rezultatin 2–1 për Shqipërinë, me gola të realizuar nga Hamdi Salihi dhe Ervin Skela, ndërsa për Kosovën shënoi Albert Bunjaku. Por rezultati nuk ishte në qendër të vëmendjes; ajo që mbetet e paharruar është atmosfera elektrizuese, flamujt kuqezi e “Dardanë”, brohoritjet pa ndalesë dhe emocionet që përlotën qindra tifozë.

Shumë prej futbollistëve që atë ditë dolën në fushë sot janë trajnerë, drejtues klubesh ose tashmë të pensionuar nga futbolli profesionist. Megjithatë, ata mbeten figura model për brezat e rinj – shembull i guximit, sakrificës dhe dashurisë për lojën.

Kjo miqësore shënoi një nga ngjarjet më të rëndësishme të periudhës para pranimit të Kosovës në organizatat ndërkombëtare të futbollit, duke i paraprirë momentit historik që do të vinte në vitin 2016: pranimi në UEFA dhe FIFA.

Ndeshja e 14 qershorit 2008 nuk ishte thjesht një duel sportiv. Ishte një deklaratë identiteti, një akt solidariteti kombëtar dhe një ditë që bashkoi dy ekipe, dy tifozëri dhe një popull të tërë nën të njëjtat ngjyra. Një kujtim që mbetet i gjallë në memorien e futbollit shqiptar.