Ndërsa Shtetet e Bashkuara dhe Irani po punojnë për të siguruar rihapjen e përhershme të Ngushticës së Hormuzit dhe rikthimin e fluksit të naftës nga Lindja e Mesme, lëvizja e ardhshme e tregut global mund të varet nga një vend që nuk është pjesë e këtyre negociatave: Kina, shkruan CNN.
Si konsumatori i dytë më i madh i naftës në botë, Kina ka ndërmarrë një sërë masash për të garantuar furnizimet e saj, pasi konflikti në Iran ka kufizuar qasjen në më shumë se 11 milionë fuçi naftë në ditë. Sipas CNN, reduktimi i importeve, përdorimi i rezervave të mëdha strategjike dhe rritja e përdorimit të energjisë së pastër kanë ndihmuar Pekinin të zbusë ndikimin e rritjes së çmimeve në tregun vendas.
Këto veprime kanë pasur efekt edhe në tregjet ndërkombëtare, ku çmimet e naftës nuk kanë shënuar rritje aq të forta sa pritej pas përshkallëzimit të konfliktit.
Me ndikimin e saj në rritje në tregjet globale të energjisë, Kina po konsiderohet gjithnjë e më shumë si një faktor kyç në përcaktimin e drejtimit të çmimeve të naftës, pavarësisht se sa shpejt do të rihapet Ngushtica e Hormuzit.
CNN citon një analizë të publikuar nga Société Générale, sipas së cilës embargoja arabe e vitit 1973, që uli furnizimin global me rreth 7 për qind, shkaktoi një rritje prej 134 për qind të çmimeve të naftës. Ndërkohë, konflikti aktual ka prekur rreth 14 për qind të furnizimit global, por pa prodhuar një rritje të ngjashme të çmimeve.
Sipas analistëve, një nga arsyet kryesore është roli i Kinës në menaxhimin e kërkesës globale për energji. Për këtë arsye, zhvillimet në ekonominë kineze dhe politikat e saj energjetike mund të jenë po aq të rëndësishme për tregjet e naftës sa edhe ngjarjet gjeopolitike në Lindjen e Mesme./Raporto24/
https://edition.cnn.com/2026/06/22/energy/oil-price-china-dependence-iran-war-intl-hnk
