Komandanti i KFOR-it, gjeneral-majori Angelo Michele Ristuccia, në takimin e shefave të Mbrojtjes së NATO-s ka vlerësuar se situata e përgjithshme e sigurisë në Kosovë është e qetë, por shumë e brishtë dhe e paqëndrueshme.
Ai falënderoi aleatët dhe partnerët për kontributin dhe mbështetjen e tyre për misionin e KFOR-it për aktivitetet e saj dhe situatën e sigurisë.
“Aktualisht situata e përgjithshme e sigurisë në Kosovë është e qetë por shumë e brishtë, e paqëndrueshme dhe e paparashikueshme, për shkak të disa çështjeve të pazgjidhura”, ka thënë Ristuccia, është njoftuar në faqen e KFOR-it në Twitter.
Ristuccia ka thënë se KFOR-i po vazhdon të zbaton çdo ditë dhe në mënyrë të paanshme mandatin e tij që e ka nga OKB-ja për të ruajtur sigurinë dhe lirinë e lëvizjes.
Ai ka thënë se KFOR-i është i gatshëm të ndërhyjë nëse është e nevojshme.
“KFOR-i po krijon kushte që të konsolidohet dhe të ecë para dialogu i lehtësuar nga BE-ja për ecje përpara”, ka shkruar Ristuccia.
