Veturat vazhdojnë të jenë cak i vjedhësve, ndërsa qytetarët po përballen me pasiguri në ambientet publike. Automjete të ndryshme po vidhen në parkingje apo hapësira të tjera të hapura, duke rritur shqetësimin në opinion.
Policia e Kosovës ka lëshuar një thirrje urgjente për ndihmë publike, lidhur me një rast të dyshuar të vjedhjes së një veture. Autoritetet janë në kërkim të një personi të dyshuar, i cili aktualisht mund të paraqesë rrezik në qarkullim.
Sipas burimeve të Gazetës Sinjali, rreth orës 13:37 është raportuar se personi i identifikuar si Shqiprim Llugagjiu është parë duke drejtuar një veturë të tipit Mercedes, ngjyrë hiri, me targa 05-345-HJ, në drejtim nga Shtimja për në Ferizaj.
I dyshuari, i cili më herët ka qenë i përfshirë në një tjetër rast të vjedhjes së veturës në Prizren – ku automjeti ishte dëmtuar rëndë – dyshohet se mund të ketë probleme të natyrës mendore. Ekziston dyshimi se edhe vetura që aktualisht e drejton mund të jetë e vjedhur.
Policia apelon qytetarët që, nëse shohin veturën ose kanë informacion për personin në fjalë, të lajmërojnë menjëherë Stacionin Policor në Shtime apo të kontaktojnë përmes numrave të emergjencës.
Ky rast konsiderohet me rrezik potencial dhe kërkon reagim të shpejtë për të parandaluar ndonjë incident serioz.
Shënim: Personi i përmendur në këtë artikull prezumohet i pafajshëm derisa fajësia e tij të vërtetohet me vendim të formës së prerë nga gjykata./Raporto24
