Komuna e Prishtinës ka reaguar pas grevës së punëtorëve të kompanisë “Pastrimi”, të cilët të enjten u mblodhën para objektit të komunës për të shprehur pakënaqësinë ndaj situatës financiare që, sipas tyre, është përkeqësuar si pasojë e mospagesës së borxheve nga ana e Komunës.
Përmes një reagimi në rrjetin social ‘Facebook’, komuna e ka quajtur të panevojshëm grumbullimin e punëtorëve para komunës, duke e konsideruar këtë veprim si një keqpërdorim të tyre për interesa politike.
“Prandaj, përderisa Kryeqyteti, është duke bërë gjithcka për tejkalimin e kësaj gjendje konsiderojmë se grumbullimi i punëtorëve të KRM “Pastrimi” para objektit të Komunës është i panevojshëm. Keqpërdorimi i tyre për qëllime politike nga menaxhmenti është i papranueshëm dhe nuk duhet të vazhdojë” – thuhet në njoftim.
Reagimi i plotë:
Të nderuar qytetarë,
Ka kohë që Kryeqyteti është angazhuar për zgjidhjen e situatës së krijuar me mbeturinat.
Prandaj, përderisa Kryeqyteti, është duke bërë gjithcka për tejkalimin e kësaj gjendje konsiderojmë se grumbullimi i punëtorëve të KRM “Pastrimi” para objektit të Komunës është i panevojshëm. Keqpërdorimi i tyre për qëllime politike nga menaxhmenti është i papranueshëm dhe nuk duhet të vazhdojë.
Siç ju kemi njoftuar, Kryeqyteti ka nënshkruar kontratën me Kompaninë Regjionale të Pastrimit, në vlerë prej 1.5 milion euro, për mirëmbajtjen dhe pastrimin e hapësirave publike në qytet.
Presim nënshkrimin e kësaj kontrate edhe nga Kompania Regjionale “Pastrimi”, me qëllim që punëtorët t’i kthehen punës dhe angazhimit të tyre në Kryeqytet.
