Kampionia e Kosovës, Drita, do të jetë mysafire e Differdange në ndeshjen kthyese të fazës ‘play-off’ të Ligës së Konferencës dhe është shumë pranë të shkruaj një faqe të re në historinë e klubit duke u kualifikuar për herë të parë në fazën e grupeve të një gare evropiane.
“Intelektualët” janë gati për aktin e dytë ndaj klubit nga Luksemburgu, pasi do të luajnë në “Stade Municipal de la Ville de Differdange” nga ora 20:00.
Ekipi i udhëhequr nga Zekirija Ramadani synon ta ruaj avantazhin minimal prej 2-1 të marrë në ndeshjen e parë të zhvilluar në Prishtinë.
Drita kërkon një fitore tjetër ose, së paku, një barazim për të siguruar kualifikimin në grupet e Ligës së Konferencës për herë të parë në historinë e klubit.
Në rast se arrin të kualifikohet, Drita do të bëhej klubi i dytë kosovar që arriti këtë sukses, pasi më parë Ballkani kishte luajtur dy herë në fazën e grupeve të Ligës së Konferencës.
