Shtetet e Bashkuara dhe Irani pritet të tërhiqen përkohësisht nga përshkallëzimi i tensioneve, pas shkëmbimit të sulmeve gjatë fundjavës, kanë bërë të ditur zyrtarë amerikanë.
Sipas një zyrtari të administratës amerikane, të dyja palët do të “ndalen për momentin”, ndërsa bisedimet teknike me Iranin mbeten në rrugën e duhur. Megjithatë, ende nuk është bërë e qartë se cili është qëndrimi zyrtar i Teheranit lidhur me këtë zhvillim.
Shkëmbimi i fundit i sulmeve vuri në provë marrëveshjen fillestare, e cila parashihte pezullimin e armiqësive për 60 ditë gjatë zhvillimit të negociatave.
Zyrtarët amerikanë kanë deklaruar gjithashtu se lundrimi në Ngushticën e Hormuzit vazhdon të jetë i lirë. Megjithatë, situata në këtë korridor strategjik mbetet e ndërlikuar, pasi janë krijuar tre rrugë të ndryshme tranziti për anijet, të organizuara nga autoritete të ndryshme.
Ndërkohë, Irani ka kërkuar tërheqjen e plotë të forcave izraelite nga Libani si pjesë e një marrëveshjeje përfundimtare me SHBA-në. Në të njëjtën kohë, përleshjet me Hezbollahun kanë vazhduar, vetëm pak ditë pasi në Uashington u nënshkrua një marrëveshje e re./Raporto24/
