8 maj, 2025 – Skuadra e Dritës, e cila e ka siguruar tashmë titullin e kampionit në AlbiMall Superligën e Kosovës, nuk arriti të vazhdojë serinë e fitoreve në kuadër të xhiros së 33-të. Skuadra gjilanase u ndal në barazim 1:1 në udhëtim ndaj kampionit të deritashëm, Ballkanit.
Pavarësisht epërsisë numerike në fushë, pas dy përjashtimeve me karton të kuq për vendasit, Drita nuk arriti të përmbysë rezultatin. Sunday Adetunji i dha epërsinë Ballkanit në minutën e 16-të, ndërsa Eris Abedini u ndëshkua me të kuq vetëm pesë minuta më pas.
Në minutën e 32-të, Besnik Krasniqi realizoi për 1:1, duke regjistruar golin e tij të nëntë këtë edicion. Ky rezultat mbeti i pandryshuar deri në fund, edhe pse Ballkani luajti me nëntë lojtarë pas një tjetër ndëshkimi në minutat e fundit.
Drita pas këtij barazimi arrin në kuotën e 70 pikëve, derisa Ballkani mban pozitën e dytë me 58 pikë.
Edhe ndeshja tjetër e ditës së sotme ndërmjet Llapit dhe Ferizajt, që u zhvillua në stadiumin “Zahir Pajaziti” në Podujevë, u mbyll me rezultat 1:1. Erion Sadriu realizoi për Ferizajn në minutën e 61-të, ndërsa Ardit Tahiri barazoi nga penalltia tetë minuta më vonë.
Ky barazim nuk ndryshoi pozitat në tabelë: Ferizaj mbetet i katërti me 49 pikë, aq sa ka edhe Malisheva në vendin e tretë, ndërsa Llapi është i teti me 41 pikë, vetëm një më pak se Dukagjini i vendit të shtatë.
