Shefja e politikës së jashtme të Bashkimit Europian, Kaja Kallas, dha më shumë detaje për paketën e re të sanksioneve, duke thënë se ajo është “paketa më e madhe në katër vjet” dhe se do ta “godasë Putinin aty ku i dhemb më shumë”.
Në një deklaratë, ajo tha:
“Kemi arritur marrëveshje për paketën e 21-të të sanksioneve kundër Rusisë.
Ajo përfshin masa gjithëpërfshirëse që synojnë sistemin financiar të Moskës, kompleksin e saj ushtarako-industrial dhe sektorin e energjisë, të cilët mbajnë në funksion ekonominë ruse të luftës.
Po e godasim Putinin aty ku i dhemb më shumë: duke ia ndërprerë burimet financiare nga të cilat ai varet për ta vazhduar luftën.
Ky nuk është fundi i rrugës sa u përket sanksioneve. Tashmë po punojmë për hapat e radhës. Bashkimi Europian duhet të jetë i gatshëm t’i përgjigjet çdo përshkallëzimi të mëtejshëm nga Rusia.
Kjo është paketa jonë më e madhe në katër vjet, me gjithsej 218 subjekte dhe individë të përfshirë në listën e sanksioneve.
Kemi vendosur masa ndaj më shumë se 100 bankave dhe operatorëve të kriptovalutave, mbi 40 anijeve të ‘flotës në hije’, si dhe ndaj disa rafinerive të naftës në Rusi dhe Bjellorusi, të cilat ndihmojnë në mbështetjen e luftës së Moskës.
Gjithashtu po i përgjigjemi sulmeve të pandërprera të Rusisë ndaj civilëve, infrastrukturës dhe trashëgimisë kulturore duke futur në listën e sanksioneve më shumë se 50 subjekte të kompleksit ushtarako-industrial, përfshirë aktorët kryesorë të përfshirë në prodhimin e dronëve rusë me rreze të gjatë veprimi.
Kjo vjen pas sanksioneve të vendosura javën e kaluar ndaj personave përgjegjës për keqtrajtimin dhe vrasjen e robërve ukrainas të luftës dhe të civilëve të ndaluar, si edhe ndaj kompanive të teknologjisë që mundësojnë represionin e Kremlinit ndaj përdoruesve të internetit”.
