Kryetari i Lidhjes Demokratike të Kosovës (LDK), Lumir Abdixhiku, i është drejtuar publikisht kryeministrit Albin Kurti lidhur me zhvillimet politike dhe mundësinë e arritjes së një marrëveshjeje ndërmjet partive.
Në një postim në Facebook, Abdixhiku ka kërkuar nga Kurti që të sqarojë qëndrimin e tij nëse synon një marrëveshje politike me LDK-në apo nëse është i orientuar drejt sigurimit të 90 votave në bashkëpunim edhe me Partinë Demokratike të Kosovës (PDK).
Ai ka theksuar se në rast se ekziston vullnet për bashkëpunim me LDK-në, atëherë duhet të hapet komunikimi i drejtpërdrejtë mes palëve.
Në këtë kontekst, Abdixhiku ka bërë të ditur se LDK-ja merr përgjegjësinë për propozimin e kandidatit për president, duke mos përjashtuar edhe emrin e Vjosa Osmanit, nëse sigurohen votat e nevojshme në Kuvend.
“I nderuar Kryeministër Kurti, Meqë po komunikojmë në distancë, Ju lutem përcaktohuni a doni marrëveshje politike me LDK-në, apo i doni 90 vota edhe me PDK-në. Nëse është kjo e dyta dhe nuk mundeni pa ta, atëherë nuk mund t’ju ndihmojmë. Kur të merreni vesh, e trajtojmë. Por, nëse doni marrëveshje politike me LDK-në, atëherë flisni me ne. Presidentin e propozojmë ne me plot përgjegjësi. Mund ta propozojmë edhe Vjosa Osmanin, nëse na i garantoni 66 vota për të,” shkruan Abdixhiku.
Deklarata e Abdixhikut vjen pas ofertës së Vetëvendosjes për të propozuar tre kandidatë konsensual për president nga PDK-ja dhe LDK-ja.
